• జట్లకొండూరులో వైసీపీకి మరో ఎదురుదెబ్బ.. టీడీపీలో చేరిన 19 కుటుంబాలు
• కూటమి అభ్యర్థుల విజయానికి సమష్టిగా కృషి చేయాలి: సోమిరెడ్డి పిలుపు

నెల్లూరు,(అక్షర దర్శిని):సర్వేపల్లి నియోజకవర్గంలో తెలుగుదేశం పార్టీలోకి చేరికలు కొనసాగుతున్నాయి. మనుబోలు మండలం జట్లకొండూరుకు చెందిన 19 కుటుంబాలు వైఎస్సార్‌సీపీని వీడి టీడీపీలో చేరాయి. నెల్లూరు వేదాయపాళెంలోని టీడీపీ కార్యాలయంలో సర్వేపల్లి ఎమ్మెల్యే సోమిరెడ్డి చంద్రమోహన్‌రెడ్డి వారికి ఆత్మీయంగా స్వాగతం పలికారు.

కూటమి ప్రభుత్వం చేపడుతున్న అభివృద్ధి కార్యక్రమాలు, అమలు చేస్తున్న సంక్షేమ పథకాల పట్ల ఆకర్షితులై పలువురు టీడీపీలో చేరుతున్నారని పార్టీ నాయకులు పేర్కొన్నారు. స్థానిక సంస్థల ఎన్నికల నేపథ్యంలో నియోజకవర్గంలో పార్టీ బలోపేతానికి ఈ చేరికలు దోహదపడతాయని వారు ఆశాభావం వ్యక్తం చేశారు.ఈ సందర్భంగా సోమిరెడ్డి చంద్రమోహన్‌రెడ్డి మాట్లాడుతూ, పార్టీ నాయకులు, కార్యకర్తలు సమష్టిగా పనిచేసి మనుబోలు జెడ్పీటీసీ అభ్యర్థి పొట్టేళ్ల ప్రసాద్‌తో పాటు కూటమి ఎంపీటీసీ అభ్యర్థులందరినీ అత్యధిక మెజార్టీతో గెలిపించాలని పిలుపునిచ్చారు. గ్రామస్థాయిలో ప్రజలతో మమేకమై కూటమి ప్రభుత్వ అభివృద్ధి, సంక్షేమ కార్యక్రమాలను వివరించాలని సూచించారు.సర్వేపల్లి నియోజకవర్గంలో రోజురోజుకూ టీడీపీలో చేరికలు పెరుగుతున్నాయని, రానున్న స్థానిక సంస్థల ఎన్నికల్లో కూటమి అభ్యర్థులు విజయాలు సాధించే దిశగా పార్టీ శ్రేణులు కృషి చేస్తున్నాయని నాయకులు తెలిపారు. మరోవైపు, పలు పంచాయతీల్లో వైఎస్సార్‌సీపీ బలహీనపడుతోందని టీడీపీ వర్గాలు పేర్కొంటున్నాయి.

స్థానిక ఎన్నికల వేళ వివిధ పార్టీల నుంచి జరుగుతున్న చేరికలు సర్వేపల్లి నియోజకవర్గ రాజకీయాల్లో చర్చనీయాంశంగా మారాయి.